l’instagram


Col asuntu d’entamar a xugar pola rede dende’l móvil escomencipié a güeyar aplicaciones prestoses que tuvieren que ver cola fotografía. La única de la que había sentío falar d’antemano, yera Instagram. Polo visto, al principiu yera namás pa apple, pero aguañu tamién la hai de baldre p’Android. Funciona como una rede social al estilu de Flickr con gallería y comentarios ente los usuarios, pero tien una carauterística perimportante que la dixebra de les demás. Toles semeyes que faes, recórtense al tan famosu tamañu cuadráu y tienes dellos filtros predefiníos que-y dan aspeutu vintage, con ruidu, dominantes y viñetéu. La primer vez que lo vi, paeciome una bona idea dende’l puntu de vista del creador, por que toos sabíamos que’l formatu cuadráu taba de moda y el rollu vintage ayuda a tapecer munchos fallos de les semeyes a la vez que-yos da un aire de modernidá cool. Ye muncho más fácil facer semeyes con esta ferramienta. Un árbol, una muria, una puerta, cualesquier cosa que tengas al lláu na to ciudá pue ser un bon oxetu pa retratar y dempués de pasar pol filtru del Instagram siempres queden bien.

Nesto hai de too. La mayoría xente que nun tien conocimientos de fotografía y ve que al facer esos cambios, les semeyes queden guapes metiendo muncha puxarra modernilla. Pero tamién hai xente con verdaderu talentu, incluso quedaes de lo que se noma instagramers.

A mi paezme que ye un xuguete que te dexa entretenete col móvil, pero ye hasta peligroso que-y coma terrenu a la fotografía dixital réflex. Al tener un estilu tan marcáu, llimita en forma la creatividá, a la par que paez, que gracies al so automatismu, cualesquier persona pue facer una semeya visualmente prestosa, siendo inda más complicao algamar resultaos orixinales. Aunque ye una aplicación exclusiva pa móviles, hay delles páxines que te dexen poder ver la to galería na rede. Una d’elles ye pictarine.com onde si te das d’alta con nomatu y contraseña, pues axuntar les cuentes de Flickr, Instagram, Picasa y dellos sitios más.

Estaya : ¿o vas dicime que non?