estereotipos

Pases gran parte la to vida intentando ser orixinal. Llega un momentu en que te fiede el dir uniformáu de cuerpu y mente y busques un furacu pol que colar d’esi amarre, pa sentite únicu y estremáu, pa tar más cerca de la to verdá, esin llazos de collores nin pintures que antroxen la lluz que la to esencia proyeuta pa fuera, siendo cosciente d’ello cuando esa lluz se reflexa en daqué esterno a tí y te da direutamente nos güeyos. La mayor parte les veces, (suel ser cosa de tiempu) en plena fuxida de los estereotipos que te dexen silente y afogáu, atopes una puerte secreta, al traviés de la que pases cautelosu y sele, descubriendo un mundu nuevu y estremáu a lo que conocíes, onde t’afayes rodeáu de tolo que pensabes que taba a milenta años lluz de tí.

Fai munchos años que mio güela me dixo que “ya ta too inventao”. Si facemos casu d’esto,’tis perfácil entender que nesa angustiosa fuxida, nun atopemos nada nuevo y acabemos abeyugándonos en daqué, esistente dende fai muncho pero tocao pola vara’l fracasu, de forma que la escasez de siguidores, nos faiga sentinos abanderaos d’ello y implicanos personalmente creyéndolo nueso. Lo complicao vien cuando te das cuenta qu’esi’tis’l primer pasu que tú mesmu/a te conviertas nun estereotipu.

Advertisements