espero vete en xixón

Dende’l mio fortín préstaríame facer público la mio asistencia a esi proyeutu de Alcuentru de Blogueros N’Asturianu, abellugáu a la solombra de la organización de La Escuela de Seronda d’esti añu, que se va cellebrar en Xixón esti fin de selmana durante los díes 28, 29 y 30 d’abril. Aprovechando coincidencies propicies col horariu llaboral y dalgún qu’otru favor de la xente que de verdá se pué nomar compañeru/a, voy poder tar nesi conceyu cola mesma ilusión que cuando entame el mio bloge. Espero que se falen coses importantes’bout la comunidá bloguera en llingua asturiana, por que si la xente que fai blogues tien daqué especial (o friki, como quieras llamalo…), los que usamos esta llingua comatosa pa llanzar a la rede los nuesos gritos, ta perclaro que tenemos unes carauterístiques concretes, que nos faen compartir una seña d’identidá mui determinada. Teo la esperanza que’l conocer a la xente que lleo notros blogues, pueda ayudame a medrar usando’l mio sitiu como formientu, teo la esperanza que se pongan en comuña coses útiles y práutiques y no perdamos el tiempu filosofando’bout coses estériles (aunque un puquiñín d’esto cabero, nun ta mal, pero ensin pasase), teo la esperanza que falemos de nomenclatures, de proyeutos que de xuru toos y toes tenemos na tiesta, y que dalgún se faiga cola andecha de toos, teo la esperanza que falemos de aconceyanos y nun futuru prósimu, ser autónomos na organización de prosimos alcuentros, onde el númberu de participantes dirá doblandose en cada ún, teo la esperanza de vete elli a tí, que entres nel mio fortín de xemes en cuando o caisti equí ensin querer.

Tamos avezaos a ver prender les esperances, na más que llogren espoxigar tres milímetros enriba la tierra, faciendo un fumu prietu y densu que cada vegada nos fai más complicao siguir manteniendo’l álitu. Pero tamién tamos tristemente avezaos a mantener firmes les idees que nos faen ser estremaos, a costa de hosties nel fociu, toletazos nel llombu y desengaños nel alma.

Tengo entendío que dan de xintar y pa los de lloñe, hay fonda a preciu mui asequible. El que quiera dir, namai tien que apuntase nesta páxina:

http://www.cmpa.es/v_juventud/apartados/pl_contenido.asp?te=602

Advertisements