la prósima manifestación

Otra mani más, la primera que se fai tras del ¿ésitu? de la cabera, onde paecía que s’había marcao un enantes y un dempués. Onde se dixo polos altavoces que nun diba a ser la última que se ficiera, pero que diba a ser una de les últimes. Eso, y la ilusión al ver la cantidá de xente que nos atopábamos elli, fizo qu’atisbáramos un puquiñín de lluz al final del túnel. Amás había rumores pola mani de conversaciones secretes que se taben manteniendo col PP, onde paecía que ya diben entrando pol aru, aunque sólo fuera p’arramplar un puñaín de votos o pa llevar la contraria al fartón. El casu’tis que ta aprosimándose otra, nesti casu pidiendo clas de llingua asturiana en toles escueles. Una más dempués de tantu tiempu, na que nun sabemos si algamaremos facer les filigranes de tolos años nel trabayu, pa poder llibrar cuando llega la hora de caleyar pola Cai Uría, con glayíos vieyos y determinación de fierro. Por que la ilusión va perdiéndose en cada pasu que damos, con paragües, con gafes de sol, de nueche, pola mañana, solos o en comuña. Pero’l convencimientu del que defiende una verdá probe y abandonada va puxando cada añu con más fuercia y lo que paecien entretenimientos de flipaos aldeanos, como dalgunos bien cercanos nomaben, ta perclaro que los años diéron-y l’apariencia d’un compromisu seriu, cultural y antirrepresor.

Pue atopase más información nesta páxina:

http://www.exunta.org/spip/article.php3?id_article=115

 

Advertisements