quexíos

La vida’tis perinxusta. Pero, nun toi falando de les inxusticies internacionales llevaes a cabu por multinacionales o mandatarios apoltronaos tras del espeyu de la falsa democracia, onde la elleición se fai ente dos persones (o partíos), sinon de los casos básicos de la vida mesma. Los casos que se puen dar al mesmu tiempu ente dos guajes de senegal, dos muyeres de San Francisco o dos raposos en Cuturrasu. Estes inxusticies viven alrodiu de ti, vesles cebase nes desgracies de los demás y más tempranu que tarde, engánchense a la to piel como una garrapata morriendo de fame, que gasta el so caberu álitu en chupar la sangre que-y va permitir siguir viviendo.

Tol mundu se quexa. Hasta el fartón que lo tien too, protesta por que tien fame, llueu por que ta xintando y más tarde por que ta demasiao fartucu. Cuando nos topamos con daqué asina, danos rabia que la visión d’un guaje mimáu quiera facer que ve la rialidá al traviés de les gafes de la inxusticia, y arriesgándonos a formar parte de la esencia de la propia inxusticia, naguamos por ver a esti tipu de xente rodeaos de mieu, incertidumbre y cola capacidá de progresión nel futuru, más escura quel furacu’l culu d’un grillu.

Sicasí, cada ún (a veces), sigue siendo cada ún, y los conceutos subxetivos como’tis la sensación d’inxusticia son llibres d’adoptar y facelos tuyos, por mui gochu, desagradecíu y refalfiáu que seyas. Faciendo una migayina d’autocrítica (esi conceutu que ta tan en desusu, anguaño, del que la xente fala, pero non prautica), pienso con vergoña, cuanto teo de fartón, refalfíáu y desagradecíu, mientres poso los güeyos per dayuri, intentando desgranar el sentíu de les ixusticies que me miren direutamente a los güeyos.

Advertisements