prima, tercia y copa

Cuando nesti paìs se intenta xunir un grupu de xente que comparte un fin común, entama a medrar la bacteria de les discrepancies y la dixebra. Les rencielles personales, la ambición personal y la infantilidá manifiesta nes decisiones a tomar son varies de les munches causes que puen desatar esti procesu. Ye perfácil llegar a ver el hipotéticu y ridículu casu de 4 asociaciones de bandurrieros zurdos nun pueblu de 400 habitantes. Na rialidá, esti fechu vese perbien no que cinca a asociaciones de gaiteros, partíos políticos asturianistes o asociaciones pro-drechos llingüisticos, entre munches otres. Estayes nes que’l puxu de l’andecha ente toos sería l’únicu camín p’algamar el so oxetivu son les más dixebraes y los años van pasando ensin deprender de los errores del pasáu.

Si la prima y la copa nun se falen cola tercia, el soníu d’esi roncón ta condergau al fracasu y enxamás dará una nota afinada. Ye una conderga que llevamos arrastrando dende munchos años, la bola amarrada a la pata del presu que-y entorpez la fuxida, agotándolu en cada intentu d’avanzar y que se fai cómplice de los perros que tan cada vez más cerca, espoleaos pol golor de la carne, el sudor y la’tisrcia.

Ye triste a la par que ridículo, pero imaxina por un momentu el día que toles fuercies se lleguen a xuntar (utopía), se dieren cuenta del error cometíu y cola fuercia y el trabayu en comuña de toos, s’algame el mesmu resultau negativu. Sería un golpe perduru y posible, del que costaría abondo recuperase.

Advertisements