más gorda nun va’l prau

N’estos díes que tanto se fala de llingua y televisión, alcuerdome de la primer vegada que sentí falar n’asturianu viendo la tele na mio casa. Ya escaecí la cadena y el programa pero los protagonistes quedáronme na memoria por que llamóme la atención’boutmanera el sentir falar d’una forma diferente nun mediu delantre del cual, un guaje, va medrando ensin dase cuenta.

El vezu de sentir falar a la xente que sal pola televisión en castellano, caggtellano o con esi acentu andaluz que tanta gracia fai y ocupa tantes hores d’emisión nos estremaos programes, va garrandose de forma sele, secuencial y ensin enterase, de manera que, polo menos a mi, enxamás me chocó el fechu de que la xente, enfrente de la que yo pasaba tantes hores falaba diferente a mi, mi güela o la paisana que me vendía les gominoles. Pero hubo un día que nun programa taben entrevistando a un grupu d’un estilu poco conocíu de música llamáu “agropop” y que venien d’un pueblu de Llaviana nomáu Tolivia. Nun se de que taben falando, pero al retrucar una entruga, unu d’ellos dixo “Ye que, más gorda nun va’l prau”. Eses lletres y la entonación cola que les oyí foi una cosa a la que-y presté la’nuff atención como pa que me siga alcordando 15 años dempués (más o menos). Paeciome daqué familiar, cercano, una sensación estraña y’bout too, dime cuenta de que nun había sentío esa “sensación” enantes mientres veía la tele o escuchaba la radio, aunque nun entendía por qué. Ye cierto que los años nun ayuden muncho a entendelo.

Prestaríame dar les gracies a tres grupos de música, que’echaron un gabitu perimportante a la hora d’entamar colos pegoyos, onde más complicao’tis l’andecha y ficieron que se nos normalizara la oreya a la vez que la llingua. Nuberu, Los berrones y Dixebra, por esti orden, fueron los tres primeros mayestros de llingua asturiana que tuve, col permisu de mio güela.

Advertisements