365 …

Fai un añu qu’entamé a llevantar les paredes del mio fortín. Yera una noche de seronda, non muy llonxana en paecíu a la de güei o la d’ayeri, na que me pasaben delles coses pela tiesta. Nun sabía hasta onde diba a llegar, aunque teo que reconocer, que nun me presta dexar les coses a medies. Igual ye por que se me asemeya a un fracasu y, aunque nun seya consciente d’ello, teo la necesidá irracional de demostrar a daquién o daqué, que puedo con ello. Nun sé… esa bipolaridá bidirecional que munchos tenemos, faime munches vegaes tirar na direición del que tién nidio que nun tien un res que demostar a naide, que ye innecesario, ridículo y un gastu de tiempu y fuercies inútil.

El casu ye que pasaron les cuatro estaciones y tornamos a la seronda, que ta entamando a sacar el pincel de los marrones y los ocres al nuesu alrodiu. Ye cosa estraña y simpática esto de los blogs. Paez que nesti añu, medró el sentimientu de comunidá, entamáronse proyeutos, y diéronse pasos perimportantes pa caleyar nun sentíu afayaízu y llóxicu. Esi ego altaneru, que dicen que tenemos los que pensamos que pue interesar a daquién, lo que nos pasa pola tiesta y llanzámoslo al mundu, altraviés de la rede, faime sentir un orgullu antroxáu de satisfacción al sentime parte del entamu d’esti movimientu. Aunque a la llarga quede pa práu, dexámoslo ehí, la primer piedra ta puesta. Nun se cuanto durará el mio trabayu, pero de mano, el primer añu, ta fechu. Gracies a tolos/es que vos parasteis dacuandu per equí, inclusu a los que vos dió por lleer daqué.

~ by Chamicu on October 10, 2007.