próspero y la blogosfera asturiana
Equi vos dexo l’enllaz onde Próspero Morán fala de la situación d’anguañu de la nuesa blogosfera. Fai un repasu a la cantidá y a la calidá de los blogs na llingua de nueso. A los que tuvistis nel I Alcuentru de Blogueros n’Asturianu asoleyáu pola Escuela de Seronda, ya vos sonarán un puquiñín, estes idees. Camentamos que tuvimos intentando dexa-y un comentariu, pero pidiónos el nome d’usuariu y contraseña de WordPress, y al metelo, díxonos que nun yera correutu. A ver qué os paez.
Yo tampoco nun pude dexa-y un comentariu, polo mesmo. Pero la verdá ye que lo que diz ye obvio. Somos pocos. Si, pero cuido que de xuru qu’el porcentaxe de xente que fala o escribe davezu n’asturianu y que amás caltién un blogue nun sedrá mui distinto al de cualisquier otra comunidá de falantes/escribientes. En cuantes a la endogamia, nun hai res que dicir, porque ye consustancial a los blogues. A la fin, una bitácora nun ye un mediu de comunicacion de mases, ye dalgo personal que sólo interesará a quienes tengan intereses o gustos comunes, y que son los que conformen una comunidá más o menos amplia que se retroalimenta pel internet, pero que nun va más allá. Y eso pasa n’asturianu o en castellanu o n’esperanto. Estos díes, cuando tabemos pa abrir el difuntu ximiélgame, pregunté a los compañeros de trabayu si conocíen Meneame, y de cinco namái lo conocía ún, que tamién tien el so blog, col que se comunica con otros aficionaos a la lliteratura.
La realidá, pienso, ye qu’internet nun ye un mediu d’esparder nada (nun siendo les canciones del Koala o los videos de Britney Spears), ye un mediu d’intercomunicar comunidaes más o menos pequeñes pero que seguirán, salvo esceiciones, sin ser quien a dir más allá. La blogosfera asturiana ta ehi, esiste, ye ruina, pero ye un puro reflexu de la realidá de lo que somos los asturianos, neofalantes o non.
Yo sabía que Próspero tenía el blog http://www.prosperomoran.com/lamaeda/ pero taba semi-escaecíu nuna entrada vieya nel tiempu. Ayeri güeyando el siempre interesante blog http://www.espeleoastur.as/ASTVRA/index.htm atopé un enllaz al blog que puse na entrada d’arriba, nomáu Próspero Morán y con una única entrada nomada “¿Hai blogosfera asturiana?”. La verdá que lo primero que fice ye planteame si yera rialmente d’él y si yera la primer entrada d’un nuevu blog que diba a entamar o namai un testu aisláu que metío pa probar daqué. Lo que me llamó la atención foi que les idees que planteaba yeren les mismes qu’espuso nel I Alcuentru de Blogueros y sobre les cuales tuvimos charrando un cachín. D’esta manera ví la oportunidá de compartilo con tola comunidá bloguera (polo menos cola qu’entre nel mio sitiu) y paecióme afayaizo pa, que nos diera que pensar y facer que xorrezcan opiniones tan interesantes como la tuya. Un saludu.