I congresu fotografía éxodos

http://congresoexodos.com/index.html

expo de juan ángel regaña en xixón

Pa los que que conocemos la so obra, esta expo de semeyes ye altamente recomendable, los que tuvimos la suerte de conocelu, ye una cita indispensable, aprovechando que vien a tierres asturianes y se avera a Xixón. Equí teneis los detalles:

Autor: Juan Ángel Regaña

Títulu: “Instantes fugaces… el momento decisivo”

Llugar: Galería Mediadvanced. Cai Ezcurdia, 8, baxu derecha. Xixón (Asturies).

Fecha: Del 01 de Febreru de 2012 hasta’l 15 de Febreru de 2012. Inauguración Vienres 03 de Febreru de 2012 a les 19:30 hores.

Horariou: De Llunes a Vienres de 09:00 h. a 14:00 h. y de 15:30 h. a 19:30 h.

“La vida está llena de instantes fugaces; hay veces que los percibimos, sin embargo otras pasan totalmente inadvertidos. En ocasiones tengo la suerte de capturar esos maravillosos instantes… cuando ocurre, simplemente me dejo llevar y aprieto el disparador justo en el momento decisivo.”

Semeyes de paisaxes. Impresión sobre papel Hahnemüle Fine Art Photo Rag Ultra Smooth y sobre papel Fujicolor Crystal DP II. Marcos con perfil d’aluminiu negru 60cm x 73,5cm + vidriu mate antireflexu.

los güeyos de la neña

Como norma xeneral, la xente tien miéu a la muerte. Nun tienen na que ver les palabres altaneres, que munchos pronuncien cuando se fala d’esti tema, cola rialidá más brutal y cruel (pola so sencillez), na que te ves inmersu cuando t’atopes cara a cara, cola certeza más fondera de que tas dexando esnalar el caberu alientu la to vida.

La primer persona que vi morrer, yera un paisano vieyu, enfermu de delles patoloxíes que nun vienen al casu y ensin más futuru nin posibilidá de llucha que siguir amestando más sofrimientu a la so agonía, antroxando un estáu deplorable que los demás daben por llamar vida. Yo enxamás había visto un muertu, pero eso nun me llamaba l’atención. Lo que de verdá me tenía intrigáu yera el procesu en sí de morrer. Cómo finaba la vida, ensin entrar nel debate de plantegase’l pasu siguiente. Teo nidio que tamos bien influenciaos pola televisión, cine y demás hestories adornaes, por eso me chocó tanto la naturalidá del procesu. Un desendolcu normal, ensin sorpreses nin otra salida más natural que la esperada.

A los pocos díes tuve la oportunidá de ver el primer nacimientu d’una persona. Aunque foi normal y nun tuvo nengun sobresaltu nin complicación, paeciome un actu violentu, de sufrimientu estremu, tanto pa la madre como pa la so fía. La neña llegaba a la vida berrando, inculcando esi sofrimientu a la xente que más la quería, como si supiera d’antemano a que mundu taba aportando.

Pasaron ya dellos añós, pero a vegaes, cuando veo esa guaja xugando na cai, alcuerdome del paisano que morrió tranquilu na so cama, de forma natural y cuando miro a los güeyos a la neña, faime que tenga menos miéu a la muerte.

la cueva’l cuélebre [curtiumetraxe]

nuevu blogue fotos de langreo

Nun ye la primer vez que dalgun conocíu o familiar que vive fuera d’Asturies, dizme que se topó con una semeya mía, restolando pela rede a la gueta d’imáxenes de Llangréu. Va tiempu, qu’esto me fizo pensar que taría prestoso, xuntar nun blogue toes estes semeyes, pa facilitar la so visualización. Prestaría tamién que les semeyes fueran de dellos autores, nacíos nel conceyu. Una forma d’amosar la visión reflexada en semeyes, de la rialidá del conceyu al traviés de los güeyos de la so propia xente.

Va pocos díes, esti proyeutu tomó forma, entamando coles semeyes de tres autores llangreanos. Nun futuru cercanu, de xuru que se amestarán dellos más, enriqueciendo esti archivu fotográficu del conceyu. Cada semeya tien la marca del estilu del so autor, pero toes tienen carauterístiques comunes, por que fuxen de lo típico y lo comercial, demostrando les mil cares d’un sitiu tan vieyu como la tierra que lu asitia.

Convídote a echar un güeyu…

http://fotosdelangreo.blogspot.com/

l’artesanu, el diseñu y l’amistá

Nun me paez que faiga falta tener munchos conocimientos o calidá pa intentar algamar resultaos, si non profesionales, polo menos, lo más asemeyao posible dientro la dignidá. La condición cimera de l’amistá, tien que ver cola so demostración. Cuando me llamó Raúl, un collaciu gaiteru y artesanu de payueles, pa dicime que quería facer unes tarxetes, lo primero que pensé ye que valía más dir a un fotógrafu o diseñador del conceyu y que ficiera la impresión y diseñu, pensando en que nun podía subir muncho en cuestión de perres. Pidió dellos presupuestos y polo visto había diferencia asgaya si lo comparabes con encargales pola rede. Hay páxines que te manden les tarxetes a casa, pero tienes que da-yos el diseñu fechu. Él tenía una idea perclara de lo que quería, lo que facilitó en forma la cosa. La parte d’arriba d’un punteru con payuela na parte d’alantre y la d’abaxu na parte d’atrás.

Esi día facía sol y yeren les cuatro la tarde, polo que la lluz yera bien dura. Buscamos un sitiu onde poner el punteru, con una lluz uniforme y un fondu llisu y tiramos seis semeyes en raw. Ficimos con photoshop un documentu nuevu, col tamañu que tieníen que tener les tarxetes y pusimos un fondu negru. Recortamos los punteros, lo meyor que pudimos, y pusímoslos nel sitiu adecuáu en les dos cares de la tarxeta. Sólo quedaba poner el textu, mandar los archivos en .jpg y esperar a que llegara a casa el resultáu.

El resultáu ye qu’esti artesanu de payueles, ya tien tarxetes.

tornando a ubuntu

Dempués de tirar el caberu portatil por problemes na pantalla, tras enterame que arreglalu diba salime tan caro como comprar otru, entamé la gueta pa mercar un ordeador. Nun ye un mal momentu, por que la teunoloxía, aunque sigue corriendo, ya nun fai que lo que merques tea totalmente pasao d’equí a seis meses.

Los que venden nun son tontos y tienen xente mui preparao que cobren munches perres, namás pa que tú entres pol aru y consumas los sos productos. En relación a esto, lo primero que te entra pol güeyu son los ordenadores de la marca Apple. Un diseñu que nun tien conparanza con nengun otru productu del mercáu y el poder de la marca que crea la necesidá de pertenencia a un grupu, fai que l’atracción que tienen estes máquines tea una influencia increible. Apple tien munches coses a favor, pero too ello ta subordinao al altu preciu de los sos productos, que sobrepasa ampliamente el preciu de un ordenador con similares prestaciones d’otra marca. El imac, ye’l sobremesa que apple ufierta. Un ordenador ensin torre, con una pantalla, un tecláu y un ratón, too ello inalánbrico. Pa que vos faigais una idea, el ratón solu, val 70 €.

El problema que yo tuve nel mio portatil, que tamien foi bien caru nel añu 2005 cuando lu merqué, foi que al ser tou una pieza,nun se podía camudar la pantalla de forma fácil y barata. Y esi mesmu problema, diba a tenelu nel imac si entamaben a salir rayes y coses rares nel monitor, por que la torre del ordenador diba integrá nesa pantalla. Escarmentáu nesi sen, quise más decantame por una máquina que pudiera dividir en pieces, cambiando cada una idiviualmente si entamaben a fallar. Un pc clónicu mercáu na tienda’l pueblu paecía la meyor opción. Al mercar nuna tienda pequeña, asegures (o asina debía ser) un bon serviciu post venta, individualizáu y una bona predisposición a la solución de problemes derivaos de la compra o’l usu del productu.

Al buscar poles tiendes cercanes, ví que los precios yeren paecíos asgaya, hasta que llegué a una onde anunciaben un ordenador con monitor y sistema operativu Ubuntu por 400€. Al paecer, al nun tener windows, aforres una llicencia de bastantes perres que abarata l’ordenador en forma. Tenía ganes de probar Ubuntu, de tener l’ordenador enteru n’asturianu y deprender como yera esti sistema. Agora puedo dicir que ye rápidu, seguru y fácil d’usar. Escaeces los antivirus, los codecs, drivers, los software de los aparatos qu’enchufes y demás impedimentos ilóxicos que faen que’l usuariu allorie delantre la pantalla. Como exemplu, nun fai falta el software de la cámara pa poder descargar y ver les semeyes, incluso les que tan en raw.

La única pega que atopé foi a la hora de procesar les semeyes. Toi demasiao avezáu al photoshop y aunque Ubuntu trai un programa similar nomáu Gimp, nun llego a afayame con él. Tendré que buscar una solución pa ello.